المشهد ده بنشوفه كتير فى الأفلام العربى
بس عمرك تخيلت أنه ممكن يحصل في الحقيقة
عنك أنت الإجابة المرة دى وخدها منى أكيدة
الاجابة : نعم.. ونعمين وتلات نعمات كمان
الزوج اللى متعود أنه يرجع من شغله
متأخر الساعة عشرة بالليل
يرجع بدرى فى اليوم ده والمطرة عمالة تمطر بره
يفتح الباب بهدوء وحذر علشان مايزيقش
_ الباب مش هو يعنى_
أي (تزييقة) مزعجة ممكن تكشفه
ويدخل البيت زى الحرامي المحترف
وتحس كده انه مش ناقصه غير قناع على عينيه
وبعدها يبئا عضو من اعضاء عصابة القناع الأسود
يقفل الباب براحة ويخلع حذاءه براحة برده
فيشوف صوابع رجليه وهى خارجة
من الشراب المقطوع
فيتنرفز زيادة بس يحاول يمسك اعصابه
يمشى على طراطيف صوابعه ولا كأنه بيطير
يقرب من باب أودة النوم ويحط ودنه على الباب
وتطول ودانه كأنه أجرهم من حمار حصاوي وهو جاى
و يسمع الكارثة.. الصدمة.. هي هي هي.. هيييييي
دى ضحكة مراته.. الخاينة.. الندلة..
الـ….”محذوف عشان الرقابة”!
يتقمص شخصية عبد الفتاح القصري في فيلم ابن حميدو
ويروح فاتح الباب بسرعة وبعنف وهو بيزعأ وبيقول :
” لا يسلم الشرف الرفيع من الأذى
حتى يراق على جوانبه الدمُ “
وبطريقة سريعة عنيفة مريعة
يحاول يفتكر فين حط السكينة
اللي قشر بيها التفاح امبارح
ويدخل على مراته وهو بيصرخ بصوت عالى :
” خااااااااااااااااااااااااااينةةةةةةةةةةةةةةةةةةة “
تقع الزوجة مفزوعة من فوق السرير
وتصاب بخوف ورعب وازبهلال نادر
وهي شايفة عيونه حمرا زى كاسات الدم
و قبل ما تسأله في إيه يا أحمد كفى الله الشر
يزعأ أحمد و: هو فين.. فينه.. اطلع يا ندل
وترن ضحكتها تانى هي هي هي.. هييييي!
فيستغرب اوى لأن مراته أدامه اخرست من الصدمة
طيب الضحكة دى خرجت منين؟
فيلاقى الضحكة جاية من التليفزيون
اللى فيه مذيعة هبلة بتقول:
نعتذر عن قطع الفيلم العربي ضحكتني والنبى يا أحمد!
لإذاعة موجز الأنباء..
ونواصل عرض الفيلم بعد انتهاء الموجز..
خليكوا معانا.. وما تمشيش بجد يا أحمد..
هي هي هي.. هييييييي
الشك ده مرض أزلي صحيح درجاته بتختلف
بين شخص والتانى وبيكون ساعات قابل للعلاج
وساعات تانية بيكون عملنا اللي علينا والباقي على ربنا
لكن هايفضل موجود طول مافى رجل وامرأة
وطالما فى حب كبير بيجمع بين قلبين
أو حب صغير يعاني من الضعف والتوتر
وطول ما التليفزيون يذيع فيلم ضحكتني والنبى يا أحمد
تعالو نتفق فى الاول ان الشك
مش عيب سهل اكتشافه بدرى
ده حاجة خبيثة بعيد عنكم!
مش بنكتشفه غيرفي المواقف المتكررة وبشكل تدريجي
وعلشان نكتشف الموضوع بسرعة
هانستعمل طريقة الهجوم خير وسيلة للدفاع
بمعنى أنه بدل ما نضييع الوقت في الشرح
والله جاية في التاكسي لوحدي
والله اللي كان قاعد جنبي في فرح بنت خالتي
ده راجل قد جدي
والله مكنش فيه حد جنبي وإنت بتكلمني في الموبايل
والله ده هاني أخويا هو اللي كان بيشرب سجاير
هانشوط فى الجول علطووووووول
وبكل وضوح وحزم هاتبصى له وتقولى له:
أنت بتشك فيا ؟
وبكده يكون كلامكم على ميه بيضة زى مابيقولوا
(اون سيراميك)
وده اقصر طريق لمعالجة الحبيب من الشك
ولو متعالجش يابنتى نصيحتى ليكي تغيريه احسن
بلا وجع دماغ بئا
هناك 4 تعليقات:
ههههههههههه
اسيرة الاقدار
بجد البوست تحفة
انا ضحكت كتير
واضح انك لسة جديدة في التدوين بس المدونة جميلة
وبجد ليها طابع خاص
جامدة اوي اوي
ربنا معاكي والتدوينة رائعة انا ضحكت كتير اوي
مستني زيارتك
الصيدلي المطحون
--> الصيدلى المطحون
ـــــــــــــــــــ
يا اهلا يا اهلا يالمطحونين كلهم
بس انت عرفت منين انى جديدة فى التدوين .. هو باين على وشى اوى كده هههههههه بص هو انا فعلا جديدة هنا يعنى فى المدونات دى بس انا بقالى حوالى 3 سنين بدخل منتديات وعندى مدونة اسمها خيارة (ومن غير تريأة على الاسم لانى بعزه جدا خلى بالك يعنى ) بس انا عاجبنى مود التدوين هنا يعنى حسيت بجو اسرى لذيذ .. ومش عارفة ليه كل ما أرد على حد اقعد ارغى ساعة
مش هطول عليك بئا (ال يعنى لسة مطولتش ) وانتظر زيارتى بس يارب الاقى مواصلات بسرعة
(اون سيراميك ) ههههههههههههههههههههه
طبعا الشك شىء مش كويس وغير منطقى بين اتنين بيحبوا بعض لان المفروض ان بينهم ثقة كافيه واللى يخون الثقة يبقى اصلا كداب من البداية وماكنش بيحب بجد
ومن الشك ما قتل لان الشك ده ظن والظن بيخلى الانسان يقعد يفكر كتير ويتعب
وكمان ربنا سبحانه وتعالى قال ان بعض الظن اثم
--> wanna b a physician
ــــــــــــــــــــــــــــــــــ
تمام كده يا دوك انت جبت المفيد والله المفروض ان بين اى اتنين بيحبوا بعض ثقة متبادلة وميكونش فى بينهم اى مجال للشك واللى يخون الثقة دى يبئا مكنش بيحب من الاول
إرسال تعليق