بـحـبـه يــا بــااااابــااااااا

مشكلة غريبة ومش عارفة الاقي لها حل
يمكن علشان مش قادرة احدد مين اللى معاه الحق
( مالها دى هبلة ولا ايه !! )
لا والله ده مش هبل انا هافهمكم قصدى واحدة واحدة
المشكلة من وجهة نظر الشباب
هى مشكلة تدخل الاهل فى اختيار ابنهم لشريكة حياته
او اختيار بنتهم لشريك حياتها
وليه مش عايزين يقتنعوا ان دى
حياة ولادهم ومستقبلهم
وهما اللى هايعيشوها وعلشان كده لازم يحترموا
اختياراتهم وقراراتهم
تلاقى الشاب من دول عمال يخبط دماغه فى الحيط
ويشد فى شعره .. ده اذا كان لسة باقى فى راسه شعر..
وعمال يزعأ ويقول :

أهلي عايزين يدمروني ويضيعوا مستقبلي
يا اسيب البنت اللى بحبها يا اما اسمع الجملة المشهورة
(( لا انت ابنى ولا اعرفك .. اطلع بره بيتىىىىى))
مش عارف هم ليه معتبرين إني لسه عيل
ومش هاقدر أحكم ولا أختار
أنا مش عايز غير بس موافقتهم ورضاهم
ومش عارف أقنعهم إزاي بالبنت اللي بحبها
.. ياعيني والله صعبان عليا يابنى..
وتلاقى واحد صاحبه ابن حلال كده
ربنا مايحكم علينا نصاحب اللى زيه
ينصحه النصيحة التمام ويقوله
- انا بئا هقولك على فكرة
تخليهم يتحايلوا عليك علشان ترضى تتجوزها
اعمل زى بسطاويسي
-بسطاويسي مين ياعم الحج انا ناقصك
وحياة ابوك تحل عنى الساعة دى
-يابنى اسمع كلامى بس
-بسطاويسي ده واحد صاحبى متعرفوش
بسسسسس وتتكرر مصايب فيلم عادل امام
“البحث عن بسطاويسي … قصدى عن فضيحة”
وطبعا البنات مش بتسلم من الموضوع ده
اذا كان الشباب بيعملوا فيهم كده مابالكم بئا
لما بنت تيجي تقول لابوها
بحبه يا باباااااااا ومش عايزة اتجوز غيره
طبعا بعد قصيدة الردح المعتبرة اللى هاترصها لها امها
ومفيش مانع ابوها يلطشها قلمين تلاتة كده
على ماقسم يعنى
هاتتجوزى اللى اخترناهولك ورجلك فوق رقبتك
..ومع انى مش عارفة شكلها هايبئا عامل ازاى
فى الزفة وهى رجلها فوق رقبتها كده..
..يلا يمكن العريس يطفش من شكلها
ويبئا عمل فيها جميلة..
وساعتها طبعا البنت بدل ماكانت عايزة علاقتها
باللى بتحبه تبئا فى النور وبعلم اهلها
هاتلعن اليوم اللى فكرت تصارحهم فيه
وتقول لنفسها كان معاه حق كان لازم أستنى شوية
ومقولهمش دلوقتى
بصراحة هما معاهم حق .. كل واحد من حقه يحدد مصيره
بالطريقة اللي يشوفها مناسبة ليه .. ولا ايييييييه
طالما هيقدر يتحمل مسئولية قراره ده
وأي نتايج ليه سواء سلبية أو إيجابية
لكن ياترى فعلا ده اللي بيحصل؟..
يعنى الواحد من دول تلاقيه قبل الارتباط
عامل فيها السبع رجالة
ويقولك انا مش محتاج لاهلى واقدر اعمل واسوى
واول مايدخل فى مشاكل الارتباط وأرفه يعمل عيشة
وكتير بعد مايصمموا على شريك حياتهم
ويقفوا فى وش اهلهم
يكتشفوا ان كلام اهلهم كان هو الصح
ويندموا انهم مسمعوش كلام اهلهم من الاول
وان حبهم كان مش مخليهم يفكروا بعقلهم
ويشوفوا الشخص ده على حقيقته
ويشوفوا عيوبه اللى اهلهم كانوا شايفينها من الاول
منقدرش ننكر ان الاهل ليهم دور كبير
فى اى علاقة ارتباط بين اى اتنين
والدور ده يا اما بيساعدهم ان علاقتهم تنجح
أو بيكون سبب في وضع العقبات في طريق أبنائهم
سواء بقصد منهم علشان مش راضيين
على اختيارات ابنائهم
أو من غير قصد نتيجة لخوفهم عليهم
وانهم عايزين يجنبوا اولادهم أي تجارب سيئة مروا بيها
لكن عادة الابناء بيتعاملوا مع اهلهم
على انهم ضدهم على طول الخط
وانهم عايزين يفرضوا عليهم رأيهم وخلاص
وبالشكل ده مش بينقبلوا اى وجهة نظر للاهل
تعاكس وجهة نظرهم
لانهم عايزين يحسوا باستقلالهم وبحريتهم
وقدرتهم على اختيار شريك حياتهم
من غير اى تدخل من الاهل
ومبيفكروش ان تدخلهم بيكون في الغالب
بدافع الخوف على أبنائهم
والرغبة في حمايتهم من أي آثار أو تجارب سلبية
تعرض ليها الأهل على مدار حياتهم
ومش معنى الكلام ده إنهم بيكونوا صح على طول الخط
أو معاهم حق دايما لكن لو الأبناء تفهموا وجهة نظرهم
وأدركوا إن ده من خوفهم عليهم
احتمال كبير قوي حاجات كتير تتغير
ومشاكل كتير تقل ومراكب كتير تمشي
حتى لو الأبناء كانوا متأكدين من إن اختيارهم صح
فممكن بشوية تفاهم يقربوا وجهات النظر

النوع التانى بئا من المشاكل بيحصل لما الاب والام
يختاروا عروسة لابنهم ويقولوا هى دى ومفيش الا دى
وهاتتجوزها يعنى هاتتجوزها
يا اما لا انت ابنى ولا اعرفك وهاحرمك من الميراث
والولد يكون مثلا مش فى دماغه الجواز دلوقتى
او قابلها ومحسش بيها ولا حس ان دى الانسانة
اللى عايز يكمل معاها حياته
اصل الجواز مش بالعافية برده
فتلاقى الست الحجة والدته طبعا متقعدش ساكتة
ودى تيجي برده
-يابنى يا حيبي حب ايه وكلام فاضى ايه
الحب الحقيقي بيجي بعد الجواز
وتسمعه وصلة الافلام العربى اللى حافظينها كلنا
يقولهم مش عايزها مش طايقها دمها تقيل على قلبى
-مفيش حاجة اسمها مش طايقها
-هى كانت قتلت لك قتيل .. مفيش غيرها
ناس كتير هاتقول الكلام ده كان زمان
لكن الكلام ده لسة بيحصل
ومنتشر جداً ومش مع البنات بس ..
لأ ده مع الأولاد كمان
وبيكون التهديد الجاهز بغضب الآباء عليهم
وده طبعا شيء بيهز أي حد وبيأثر فيه
حتى لو مكنش محتاج الأهل ماديا
لكن الحرص على رضاهم بيكون مهم برضه
وطبعاً مبدأ الإجبار ده مرفوض نهائي
سواء كانت وجهة نظر الأهل صح ولا غلط
وسواء كان اختيارهم كويس ولا مش كويس
وساعتها كلمة لأ لازم تتقال
وبصوت عالي ومن غير خوف
لأن ساعتها هيكونوا فعلاً غلطانين بشدة
على الأقل في طريقة عرض الفكرة
وانهم محاولوش يقنعوا أبنائهم بالراحة وبالعقل
فحتى لو كانت وجهة نظرهم سليمة واختيارهم صح
لازم يكون الابن والابنة راضيين تمامًا
عن شريك أو شريكة حياتهم
اللي هيقضوا معاهم باقي العمر
…
الملخص المفيد لكل الرغى
اللى انا عمالة ارغى فيه من الصبح ده
وايدي وجعتنى من كتر الكتابة
إن للأهل دور أساسي في حياة أبنائهم
واى حاجة بيعملوها بتكون من خوفهم عليهم
وانهم عايزين يحموهم لكن ممكن طريقتهم في التعبير
عن الخوف ده تكون غلط وساعتها مش المفروض
يكون الحل في الصدام أو في خسارتهم
لكن معظم الحلول هتيجي بالنقاش الهادى
وممكن نحاول نوسط أطراف موثوق فيهم وفي عقلهم
ويكونوا قريبين منهم ويقدروا يقنعوهم
وكمان لازم احنا نتفهم وجهة نظر الأهل
ومنعندش معاهم لمجرد العناد لأنهم مهما كانوا
مش ممكن هيكونوا بيكرهونا
أو يكونوا قاصدين يتسببوا في أي أذى لينا
وتصبحوا على خير..