وحشتونىىىىىىىى :$

السلام عليكم ورحمة الله وبركاته

انا بجد مش عارفة اعتذرلكم ازاى على الغيبة دى كلها

بس انا بجد اضغطت السنة دى جامد اوى فى الكلية والمشاريع

بقيت بشوف بيتنا بالصدفة .. اول مرة احس ان بيتنا وحشنى

هههههههههههههههههههه

بجد بجد انتو وحشتونى اوىىىىىىىىىىىى

وميرسى لكل الناس اللى سألت عليا ربنا يخليكوا ليا

نفسى ارجع اتابع معاكو بس واضح ان لحد ما السنة دى تخلص مش هعرف ادخل خالص

ادعولى بئا ومتزعلوش منى

:$

حريق المسرح القومى .. السبب فيه ابو اشرف وابنه اشرف

اقراااااااااا الحادثةةةةةةةةة
طبعا كلنا سمعنا عن حادثة حريق المسرح القومى
بس مش ده الجديد اللى انا جاية اقولكم عليه
الجديد بئا انهم عرفوا مين السبب فى الحريق ده

فى حوار تليفزبونى فريد من نوعه
واحمد من نوعه وجمال من نوعه برده
لانك لو لفيت الدنيا كلها مش هتلاقى حوار زيه
كانت المذيعة مستضيفة مسئول كبير فى البلد
(من اصحاب الوزن التقيل يعنى)

المذيعة: احب فى الاول ارحب بسيادتك معانا فى برنامج

قول الحقيقة ورزقك ورزقنا على الله .. اهلا بيك يا فندم ..

بصراحة هو سؤال واحد شاغل بال كل الشعب المصرى

وهو ياترى ايه اخر التطورات فى حادثة حريق المسرح القومى ؟

وهل عرفتوا مين اللى عملها ولا لسة جارى البحث عنه فى مستنقعات نيجيريا؟
وطبعا قبل مايجاوب المسئول الكبير على السؤال ابتسمت المذيعة ابتسامة بلهاء

وبصت لنا (المشاهدين يعنى) وقالت : فاصل ونعود
والفاصل ده بئا هرونا اعلانات يجي بـ 10 جنيه اعلانات كده
لحدما طلعوا روحنا واخويا قاعد جنبى مزهقنى
اخويا: يابنتى اقلبى بلا دوشة دماغ
انا: يابنى استنى شوية عايزة اعرف مين اللى حرق المسرح
اخويا:يعنى هى جت على المسرح ياستى اريحك انا واقولك اللى حرقه ماس كهربائى ..

اقلبى القناة بئا عايز اشوف المسلسل
انا : اهو ده اللى انت فالح فيه وبعدين ما المسلسل بتاعك بيتعاد 15 مرة فى اليوم

ابئا شوفه فى الاعادة رقم 12
اخويا (وهو بيحاول انه يخطف منى الريموت وانا متبتة فيه زى مايكون مصروف الشهر) :

بطلى غلاسة بئا عايز اعرف الدالى هايسيب مرات ابنه تتجوز ولا لأ
ولاقيت الفاصل الاعلانى خلص الحمدلله اخيرا
انا: بس يا حبيبي اقعد ساكت البرنامج ابتدى خليني اسمع هايقول ايه الراجل ابو وش بشوش ده
المذيعة (تبتسم نفس الابتسامة البلهاء) : اهلا بيكم اعزائى المشاهدين رجعنا بعد الفاصل

وهنسمع دلوقتى رد السيد المسئول عن سؤالى اللى قولته قبل الفاصل
المسئول : ممكن تعيدي السؤال تانى اصلى نسيت كنا بنتكلم فى ايه
(ليه حق طبعا ماهى سايبة الراجل ساعة الا ربع وواخدة فاصل لازم مخه يفَّوت طبعا)
المذيعة :ياترى ايه اخر التطورات فى حادثة حريق المسرح القومى ؟

وهل عرفتوا مين اللى عملها ولا لسة جارى البحث عنه؟
المسئول: والله احنا شكلنا لجنة لتقصّي الحقائق من خيرة ظباط البلد ووصلوا لنتائج مبهرة واكتشفوا ان حريق المسرح القومى كان غلطة مش مقصودة.. واحنا بناء على التقرير ده قولنا خلاص مادام الموضوع مش مقصود يبقى المسامح كريم واحنا في ايام مفترجه وملوش لزوم ننكّد على حد

المذيعة: طيب ممكن نقول للسادة المشاهدين نتائج التحقيق ولا دي اسرار عليا؟

المسؤول: والله هيّ اسرار عليا جدا بس علشان خاطر عيونك الحلوين دول

انا هقولهم.. هوّ الموضوع بكل بساطة ان في واحد اسمه ابو اشرف

المذيعة (بفضول): اسمه ايه يافندم؟

المسؤول: اسمه ابو أشرف واسمه ده دليل على المجهود اللي بذلوه الظباط في التحقيق

لدرجة انهم قدروا يعرفوا اسمه واسم ابنه كمان

المذيعة (بفرحة): لا والله العظيم لازم يترقّوا على اللي عملوه ده

المسؤول: الناس دي بيشتغلوا في صمت من اجل مصر ومن اجل شعب مصر.. المهم ابو اشرف ده بئا بيشتغل عامل فى المسرح يعنى شاى قهوة حاجة ساقعة بيبس المهم ابو اشرف متعود يعمل الشاى والقهوة على الباجور .. وهو قاعد بيعمل فنجان قهوة محترم يعدل بيه دماغه النار مسكت في جلابية الواد اشرف .. اصل ابوه قال ياخده معاه يتعلم صنعة بدل ماهو قاعد لا شغلة ولا مشغلة فى البيت كده .. الواد الغبي ابن الغبي فضل يجري في المسرح وهو مولع لحد ماولّع في المسرح كله.. الغبي مش ولع خلاص بقي يقعد في مكانه لا.. فرحان انه ولع وعمال يجري في المسرح لحد ماولع فيه كله.. واحنا الحمد لله صادرنا الباجور والموضوع اتلمّ وكل حي بياخد نصيبه وكفاية على ابو اشرف حريق ابنه اشرف

المذيعة: والله يا فندم مجهود كبير جدا تشكروا عليه وربنا يخليكوا للبلد

وراحت واخدة فاصل فى سبع ساعات
انا قولت اقوم اقيّل شوية اصل ساعة القيلولة دى متتعوضش
وابئا اشوف باقى الحلقة لما اصحى فى الاعادة

مش عايزين شعارات .. ندخل فى المفيد

بصوا يا جماعة انا بصراحة

مش عاجبنى الحال اللى وصلنا له ده خالص

كل شوية واحد يطلع لنا بشعارات فارغة

والعمل والاجتهاد والعزيمة والشقاء والفول بالزيت

سيبكم من الكلام ده مبقاش جايب همه دلوقتى

وركزوا انتو معايا بس دقيقتين

وانتو تعرفوا انى مش عايزة حاجة غير مصلحتكم

نبتدى بأول نصيحة ونقول :

1

خلى هدفك فى الحياة

هو الراحة ثم الاسترخاء ثم النوم

2

حب سريرك اوى

لان ده مملكتك الوحيدة

3

ارتاح بالنهار
علشان تعرف تنام بسرعة بالليل

4

العمل شيء مقدس

علشان كده اوعا تقرب منه

5

لا تؤجل عمل اليوم الى الغد

طالما ممكن تأجله لبعد غد او بعد بعده

6

اعمل اللى تقدر عليه

وحاول تشوف حد غيرك يعمل شغلك بدالك

7

متقلقش محدش هيموت لو انت مشتغلتش

بالعكس يمكن البعض ينضروا لو انت اشتغلت

8

لو حسيت انك عندك رغبة فى الشغل
استرخي شوية لحد ماتزول الرغبة دى

9

اوعا تنسى ان العمل مفيد جدا للصحة

وعلشان كده لازم تعمل خير وتسيبه للمرضى

10

اللى يقولك كلام هادف وابن ناس زى ده

لازم تصدقه وتعمل بيه هو يعنى عايز ايه غير مصلحتك

..

..

شوفت بئا انا ريحتك ازاى وشيلت عنك هموم كتير

ومن غير مانقول شعارات ولا كلام يوجع الدماغ

متنساش بئا الحلاوة بتاعتى

خليك ايجابى

تعاطفك لوحده مش كفاية

وكده اقدر اقولكم وانا مطمنة وحاطة فى بطنى بطيخة صيفي

وواحدة تانية شتوى للزمن

كل سنة وانتم طيبين

كل سنة وانتم طيبين

ووسط اهلكم وحبايبكم معيدين

وبالكحك والبسكوت فطرانين ومتعشيين

وبالبتيفور والغريبة بعد كل اكلة محليين

وبالبومب والصواريخ مصدعين

وبالمراجيح لاعبين ومبسوطين

(ومحدش يقولى كبرنا على المراجيح يا حلوين)

كل سنة وانتو على مدونتى داخلين طالعين

وكل بوست يعجبكم اوام تروحوا عليه معلقين

ومتنسوش قبل ماتخرجوا تكونوا سايبين

العيدية بتاعتى فى الحصالة اللى فوق دى يا شاطرين

أنا وصاحبتى .. و .. سواق التاكسى

موقف حصلى امبارح خلانى خلاص بئا
مش قادرة استحمل رخامة سواقين التاكسيات
انا بقالى 4 سنين دلوقتى مضطرة للاسف
اتعامل مع سواقين التاكسى
لانه الطريقة الوحيدة اللى اعرف اروح بيها
الكلية والكورسات بتاعتى
بجد شوفت عجايب مع التاكسيات
اخرهم بئا كان موقف امبارح
وقفت التاكسى انا وصاحبتى
ومن ساعة ماركبنا وانا مش مرتاحة له
اصلى بيني وبينكم من كتر ما اتعاملت معاهم
خلاص بقيت بحس بيهم
المهم .. خير اللهم اجعله خير كان المفروض انى راكبة تاكسى
لكن اكتشفت بعد ماركبت انى راكبة اتوبيس
لا اتوبيس ايه ده الاتوبيس بيقف فى المحطات بس
صاحبنا ده بئا بيقف ادام كل واحد واقف فى الشارع
حتى من غير مايشاور له
ده لو واحد حتى ماشى ووقف علشان يعطس بيقف له برده
بجد اتخنقت منه اوى وكل شوية ابص فى الساعة
اكتشفت اننا لسة متحركناش من شارعنا بقالنا ربع ساعة
بسبب ان الباشا عايز يركب اى حد وخلاص
المهم يملى التاكسى على الاخر
ويجمع اكبر قدر من الاجرة ممكن ياخده فى التوصيلة الواحدة
وحاولت امسك اعصابى واهدى صاحبتى
اصلكم مش تعرفوها دى شرانية
ممكن تخبطه بحاجة تجيب اجله واحنا ورانا محاضرات
و عايزين نروح فريش علشان نركز فى الكلية
اللى مش بنفهم منها حاجة دى
المهم بئا ومعرفش ازااااااى تلات ستات
(من اللى هما اصحاب الوزن التقيل يعنى)
شاوروا للتاكسى بتاعنا وللاسف طريقهم طلع من طريقنا
وهو طبعا مش يهون عليه يكسفهم ابدا ..
معقول يكسفهم برده ده حتى يبئا عيب
طيب يا عم الحج انت مش واخد بالك
ان التاكسى بتاعك يادوب اربعة راكب وبالعافية
ده هما لوحدهم عايزين تاكسى 6 راكب واحنا اتنين كمان
يعنى محتاجين ميكروباس يجي يشيلنا كلنا
واكلمه واقوله ازاى يعنى حضرتك هايركبوا معانا دول تلاتة
يقولى انتى عارفة الشوارع بقت زحمة
والناس عايزة توصل اشغالها
والناس لبعضيها ونستحمل بعض
كان ناقص يشهد عليا الشارع كله
ويقولهم بصوا البنت دى وحشة

ومش عايزة تساعد الناس الحلوين
والى فرسنى برده التلات ستات دول
يعنى ياترى هما مش شايفين
ان فى اتنين راكبين جوه التاكسى مش هوا قاعد يعنى
وفضلنا واقفين حوالى 5 دقايق بيفكروا ازاى هايركبوا
مع ان الموقف باين يعنى ومش محتاج تفكير
مفيش مكااااااااااان .. وقفوا تاكسى تانىىىىىى
واخيرا اقتنعوا وقالوا له خلاص مش هاينفع
وهو طبعا على عينه وعلى ودانه انهم مركبوش معانا
وفضلنا نكافح معاه فى سياسة
” فرملة لكل مواطن ” اللى هو متبعها دى
لحد ما الحمدلله ربنا رزقه بواحد
كان رايح مشوار كده مش عارفة فين
قاله هاوصلهم وبعدين اوصلك مكان مانت عايز
لا كان الناقص كمان يوصله هو الاول علشان تبئا كملت
واخيرا وبعد عذاب وصلنا الحمدلله لباب الكلية بعد طبعا
ما كنا اتأخرنا عن المحاضرة الاولى حوالى ساعة كده
ونزلت من التاكسى انا وصاحبتى
بندعى ربنا نخرج من الكلية دى بئا
بسسسسسسسسسس علشان نرتاح من سواقين التاكسيات

ياترى انت قتلت قبل كده !!

بصراحة كده ساعات كتير بيخطر على بالى حاجات
جايز تكون غريبة وجايز ناس كتير تقول عليا
(عبيطة دى ولا ايه !! )
لكن انا ببئا شايفاها حاجات ممكن تغير مجرى حياتنا كله
وعلشان كده قولت من هنا ورايح
مش هاكتم الافكار دى جوايا
واللى هايجي على بالى هاقوله
وابئا اتخانق مع اللى مش عاجبه بعدين
وشخبوطتى النهارده هابدأها بسؤال مهم جدا وحيوي
ياترى انت قتلت قبل كده ؟
طبعا كله هايبرأ لى !!
جرى ايه يا ست الكتكوتة
انتى فاكرة نفسك مأمورة القسم ؟
براحة عليا بس يا جماعة مش كده
ده كله بالخناق الا الموضوع ده لازم يكون بالخناق برده
على فكرة السؤال مش غريب خالص لأننا كلنا بنقتل
عارفين بنقتل ايه ؟
بنقتل حاجة مهمة جدا فى حياتنا .. بنقتل احلامنا
وطبعا انا مقصدش بالاحلام اللى بنشوفها واحنا نايمين
لأن زى ماكلنا عارفين ان كله مع مشاكل الشغل
والمواصلات والفلوس ولو متجوز وعندك عيال
ده طبعا غير حال البلد نفسه
اللى بئا لا يسر عدو ولا حبيب
هاتلاقى نفسك يا عينى مضغوط طول النهار
وترجع بالليل تفرغ ده فى احلامك
اللى عادة بتكون كوابيس ويبئا صوت تخاريفك
جايب أول الشارع
لكن أنا قصدى الحلم اللى ممكن تتحكم فيه
اللحظة اللى ممكن تعدى عليك وتفكر فيها فى المستقبل
كتير مننا بيقتل اللحظة دى ..
بيقتلها لما فجأة يفوق نفسه من الحلم
وبكل رخامة يقول لنفسه
“ياعم فوق دى احلام اليقظة”
بيقتلها لما مش بيحاول يحققها بدل مايحبط نفسه ويحبطها معاه
ده غير بئا الناس اللى قتلت الحلم من بدرى
وبطلت تحلم من أصله
انتوا عارفين لو كل واحد حاول بس يحقق
واحد من الالف من أحلامه
حاجات كتير اوى هاتتغير
أولا هايحس بطعم النجاح وهيلاقى نفسه
بدأ فى تحقيق حلم ورا حلم
تانى حاجه هايبقى قدام نفسه راضى حتى لو فشل
ويقول انا عملت اللى عليا
بدل ما يجى قدام المرايه الصبح ويبص لنفسه بقرف وغيظ
بعد ما يلاقى العمر فات وهو واقف محلك سر
ناس كتير بتقتل الاحلام بكلام فارغ جواهم بس
“أنا مش عندى القدرات اللى تساعدنى”
” الحياه مش بتدى الواحد كل حاجة”
“فيه كتير حاولوا وما وصلوش”
” أنا خلاص سنى كبر “
ومليون حجة وحجة وكأنه عمال يجيب طوب ورمل وزلط
ويبنى جدران حوالين نفسه
كل كلمه من الكلمات دى جدار جديد
لحد ما يلاقى نفسه بيتخنق ويحس باليأس
لأنه برمج عقله على الاستسلام وبس
ايه رأيكم ما تيجوا نجرب نهد الجدران دى
ناخد بس اول خطوة
وصدقونى اللى بيدوق طعم النجاح مرة
بينحت فى الصخر علشان يدوقه مرة تانية
احلم وعيش حلمك جواك وحاول وافشل وحاول وافشل
واعرف ان كل فشل بيمر عليك عبارة عن نجاح
لانه بيديلك خبرات وحاجات كتير جدا انت مش بتحس بيها
لأنك بتركز بس على ان ده فشل
ودايما فكر فى ان الصعود لأعلى اصعب من الهبوط صحيح ..
بس طعمه ألذ
معلش انا عارفة انى طولت عليكم
بس ادينا يندردش مع بعض
ولا اييييييييييييه
!!!!!!!!!

دنيا غريبة ..!!

دنيا غريبة .. فى لحظة تلاقى نفسك جانى ومجنى عليه
ومنتش عارف انت مين فيهم
ومش لاقى حد تلومه لانك انت اللى عملت فى نفسك كده
تلوم نفسك وفى نفس الوقت يصعب عليك حالك
قلبك بيتقطع وبيبكى .. حاسس بألمه ومش قادر تساعده
عقلك تايه منك مش عارف تفكر ولا قادر تنسى
روحك ضايعة منك .. بتدور عليها ومش لاقيها
حتى دموعك مش مطاوعاك ومش عايزة تنزل

علشان تخفف عنك شوية
فجأة تحس انك لوحدك والدنيا كلها مدياك ضهرها
اللى بتحبهم خرجوا من حياتك من غير استئذان ورموك ورا ضهرهم
بقيت بالنسبة لهم حمل تقيل نفسهم يرموه ويخلصوا منه
مع انك بتحبهم وعمرك ماجرحتهم

ومش قادر تنساهم ولا ترميهم ورا ضهرك
حاسس انك ضعيف اوى .. كل حاجة فيك بتنهار ادام عينيك
وانت واقف بتتفرج على نفسك وانت بتقع ومحدش مادد لك ايديه
ولا قادر تمد ايدك حتى لنفسك
ليه عملوا فيك كده .. ليه بيجرحوك اوى كده
ليه هونت عليهم وهم مهانوش عليك
ليه بعدوا عنك وانت لسة بتبكى عليهم
ليه هما غاليين عندك وانت رخيص اوى فى عينيهم
ليه مفكروش فى جرحك وانت كل اللى شاغلك ازاى تداوى جراحهم
بتستنى تسمع خبر حلو عنهم .. بتستنى حد منهم يحن قلبه
وهما ولا على بالهم
الف ليه وليه مش لاقية لها اجابة
ومليون ااااااه بتصرخ جوايا مش لاقية لها دوا
ليه قلبى طلع طيب ليه مطلعش قاسى زى قلوبهم
ياريت كان بايدي كنت بدلت قلبى بحجر يستحمل قسوتهم
بس برجع واقول كتر الف خيرهم
لولاهم مشاعر كتير جوايا مكنتش عرفتها ولا حسيت بيها
انا مديونة لهم باحلى سنين عمرى عشتها وانا وياهم
ومهما عملوا فيا مقدرش انسى ان فى يوم من الايام
كانوا هما سبب فرحتى الوحيد
حتى لو دلوقتى بقوا سبب دمعتى فليهم جوايا اجمل ذكريات عمرى
اللى عمرى ما هنساها

تهييس ما بعد الميد تيرم

أولآ مساااااء الخيييييير على كل اللى بيعدى من هنا

(ده اذا كان فى حد اصلا بيعدى من هنا)

الموضوع ده كنت كتبته من حوالى 5 شهور

من ايام الميد تيرم بتاع التيرم التانى السنة اللى فاتت

ومش عارفة ايه اللى فكرنى بيه جايز علشان الدراسة بعد بكرة

الحكاية ومافيها ان الميد تيرم كان 5 امتحانات

منهم تلاتة مش عرفت احل فيهم حاجة

ورجعت وأنا بسأل نفسى السؤال العبقرى ده

“ياترى ايه السبب؟”

وعلشان أسهلها على نفسى اديتلها شوية اختيارات:-

1- كنت بستهبل كتير ومش ذاكرت كويس

2- ماكنش فيه وقت

3- أصابنى الزهايمر وأنا فى عز شبابى

ومش بقيت أعرف أصم زى زمان

(أنا أصلا مش كنت بعرف أصم زمان)

4- المواد طويلة ومش عارفة لها أول من آخر

5- جميع ما سبق

وعلشان نفسى مش بتحب تكدب عليا فاختارت

الاجابة الاخيرة

آه..بصراحة ضيعت وقت كتير

بس أنا كده مش بعرف أقعد وشى فى وش الورق طول اليوم

يعنى شوية مذاكرة وشويتين تلاتة كده أى حاجة تانية

والمشكلة برده ان المواد بتاعتنا يعنى عايزة الناس الدحيحة

اللى بيعشقوا المذاكرة دول ليل ونهار

وانا طبعا لازم ييجى لى زهايمر

والحاجة لو مذاكراها حتى قبل كده

اجى قبل الامتحان وابئا كأنى اول مرة اشوفها فى حياتى

بس انا حاسة ان ده طبيعي جدا

يعنى واحدة بقالها 16 سنة بتدرس فى مصر المحروقة

قصدى مصر المحروتة يوووووه اقصد المحروصة يعنى

دماغى عمالة تتحشى كلام ومعلومات

نفسى اعرف فايدتهم ايه بالنسبة لى

ومع ذلك كنت باطلع من الاوائل الحمد لله

بس الظاهر الواحد خلاص ذاكرته اتملت ع الاخر

وبقت تدلدق كمان

ودايما اسمع من اللى حواليا ان مفيش حاجة تيجى كده

يعنى وما نيل المطالب بالتمنى .. يعنى من الاخر

(( محدش بياكلها بالساهل.. ))

يلا حصل خير..وزى ماقال اسمه ايه ده

“ماتعيطش على اللبن المدلوق”

فى بئا حاجة اخيرة عايزة اقولهالكم برده

ان المستحيلات أربعة

(سامعة واحد بيقولى وكمان مش عارفة تعدى

دول هما تلاتة بس)

هاقوله لا المستحيلات بقوا اربعة دلوقتى

الغول والعنقاء والخل الوفى

ومستقبل باهر فى ظل نظام تعليم فاشل

عاوزله زمن عشان يتغير

-أكون أنا انتقلت الى رحمة الله-

ده اذا كانوا أصلا ناويين يغيروه

وفى الاخر أحب أسمع أغنية

( سيد الحبايب يا حنانا انت )

النشرة اللولبية .. وعجائب تليفزيونية

فى مسلسل تليفزيونى حصلت ظاهرة هى الاولى من نوعها
واكيد فقط وحصريا عندنا احنا بس
فى اول لقطة من المشهد ظهر البطل لابس نظارة نظر
وفى اللقطة اللى بعدها من نفس المشهد من غير نظارة
وفى اللقطة الثالثة بئا لابس النظارة
شوف ازاى .. سبحان الله يعنى
مع انه لا خرج من المشهد ولا دخل
ولا شوفناه وهو بيلبس النظارة ولا وهو بيقلعها
ورغم ان المشهد مليان ممثلين
ده غير كاست الاخراج والناس اللى واقفه فى البلاتوه
الا ان محدش فيهم قاله
خد بالك من النظارة يا استاذ!

فى مسلسل تانى بئا البطل لابس باروكة على راسه
ال يعنى خلاص هى دى اللى هاتصغره 15 ولا 20 سنة
الباروكة دى برده هى الاولى من نوعها
لانها اول باروكة متحركة فى العالم كله
فى مشهد تلاقيها فوق حواجبه يادوب مفيش بتاع 20 سم
وفى مشهد تانى تلاقيها فوق حواجبه ب 50 سم
وسمعت انها على اخر رمضان هاتنور

وفى مسلسل تالت بئا ظهر بطل من ابطاله
فى دور واحد يهودى من رجالة المافيا
ولابس باروكة شيك موت تحس انها شبه فروة الخروف
الجميل بئا ان شنبه اللى مركبه واللى ناحية فيه اطول من ناحية
كل مايتكلم تحس انه قرب يطير من وشه
وجارى البحث عن اللئيم اللى خلص اللزق اللى لزقوا بيه الشنب

وفى نفس المسلسل التالت ده واللى المفروض ان احداثه فى السبعينيات
ظهر البطل وهو بيشغل شريط فيديو
والفيديو بئا موديل التسعينيات ان مكنش موديل 2008
ولا يمكن علشان هو طالع راجل واصل يعنى
ومحدش هيسبقه المرة دى على حد قوله فى تتر المسلسل
فجابوا له فيديو مخصوص من المستقبل!!

فى برنامج تليفزيونى هو الاول والاخير من نوعه
استضافت لميس الحديدي حنان ترك
انا مكنتش متباعة الحلقة كلها
لكن لسوء حظى وانا بقلب فى القنوات
لحقت اخر سؤال فى الحلقة
(وياريتنى ما لحقته)
سألت لميس الحاجة حنان ايه مواصفات الدور
اللى ممكن تقبله بعد الحجاب
وكانت اجابة الحاجة حنان بالحرف الواحد
"لو السيناريو اللى انا مرشحة له اتعرض على حبيبي رسول الله
وقراه وقال لو عملتيه تبقى من أمتى .. هاعمله بكرة الصبح"!!!
حظها بئا انى بكتب دلوقتى وانا صايمة
فمش هاعرف اعلق على كلام ستنا الحاجة لان اى كلام هاقوله
هايفطرنى وانا مش مستعدة افطر عليها

وفى برنامج تانى فريد من نوعه برده
استضافوا منى عبد الغنى وسألوها
عن شكل الفنانة المحجبة ومظهرها الاسلامى
فأكدت الحاجة منى ..
(على فكرة الحاجة منى والحاجة حنان ده مش معناه انهم حجوا ولا حاجة)
علشان محدش يفهم غلط بس..
وكانت اجابتها على السؤال ان لازم يكون مظهرها عصرى
وتلبس حاجة مبهجة
ولو ان حد من الصحابة كان موجود فى الزمن ده
كان هايبئا معاه احدث موبايل وعربية ولابس اشيك ملابس
استغفر الله العظيم هى الناس دى ايه!!
اللهم انى صائمة

وعجبى ...

مش مصدقة عويناتى !!

يااااااااااااااااااااه تم بحمد الله

والله انا مش مصدقة نفسى انى غيرت ستايل البلوج

اصل انا من ساعة ماعملتها وانا بتفرج على بلوجات الناس من حواليا بحس انى جاية من العصر الحجرى

او جاية راكبة الناقة مثلا والناس كلها راكبة عربيات فور باى فور

وكنت هموت واعرف الناس دى بتغير شكل البلوج بتاعتهم ازاى منا قلبت مليووون مرة ملقتش غير اربع اشكال ستاندرد جدااا ومفيش بينهم اى اختلاف

وبعد كفاح دام 4 ساعات وانا بحاول اكتشف ازاى ممكن اغير ستايل البلوج

اكتشفت انى المفروض انا اللى ادور على الستايل اللى يعجبنى واجيبه وبعد ماوصلت للخطوة المتقدمة دى (الله اكبر عليا عرفتها لوحدى مش عايزة قر.. ها) لاقيت نفسى معايا الكود ومش عارفة احطه فين بس الحمدلله ربنا كبير بالصدفة وانا بقلب لاقيت مكان كده فيه كود شبه اللى معايا قولت يلا بئا اجرب حظى توكلت على الله وروحت لاطعة الكود اللى معايا وعملت سيف وطلعت اجرى .. طيب وبعدين منا لازم ادخل اشوف ايه اللى حصل شجعت نفسى ودخلت اشوف اثار اختراعاتى الجهنمية اللولبية والحمدلله لاقيت الستايل القديم راح وراح معاه كل التعديلات اللى كنت عاملاها .. اللهم لا اعتراض طبعا منا اللى جبته لنفسى .. بس المرة دى بئا كنت عارفة طريقي والحمدلله عرفت ارجع كل حاجة مكانها ولولا ان الساعة 6 ونص الصبح والناس نايمة كنت فقعتلى زغروتين حلوين كده (والحمدلله ان الناس نايمة لانى اصلا مبعرفش ازغرت) وهيييييييييييييييييييييه بئا عندى ستايل جديد

قولولى بئا ايه رأيكم ..